Vertel deur ‘n ouma van twee seuntjies en amper vier dogtertjies in die een-en-twintigste eeu

Hebreeuse seuntjie,

gebore in ‘n tyd toe sy mense

in slawerny gedompel was en

hulle flukse bevolkingsgroei

die slawemeesters bedreig het.

Sy ma het hom weggesteek,

sy sussie het hom opgepas en

‘n prinses het hom aangeneem.

Grootgemaak as bevoorregte

seun van die Egiptiese Farao wat

al sy volksboeties uitgemoor het.

Sy naam was Moses en hy het

sy mense uit slawerny uit bevry.

 

Hebreeuse seuntjie,

gebore in die nageslag van

koning Dawid gedurende die

tyd toe sy bose, moordlustige

ouma die koningin van Juda was.

Sy was magsbefoeterd en het

amper daarin geslaag om elke

koninklike nasaat, haar eie kinders

en haar eie kleinkinders, uit te moor.

In die tempel, het sy tannie hom

weggesteek en sy oom hom geleer.

Sy naam was Jehoas en hy het die

koninklike nageslag weer herstel.

 

Hebreeuse seuntjie,

gebore in die stad van koning Dawid,

‘n nasaat van hom, gedurende die tyd

toe die Romeinse Ryk geheers het.

Joodse koning Herodes was so

bedreig deur die tyding van sy geboorte

dat hy al die babaseuntjies van sy

eie mense in die stad uitgemoor het.

Sy ma en aanneempa het, met hom,

na die veiligheid van Egipte gevlug.

Hy is die Seun van God, Jesus Christus

en Hy het Sy mense en die ganse mensdom

vrygekoop van sonde en ewige dood.

Ten spyte van al die sleg en seer aan

die stukkende kant van die ewigheid,

bly ons Lewende God goed en genadig.

Sy troue liefde ken geen einde nie.

Met eerbied en ontsag vir Hom, bly ons

vertrou op Hom, ons ewige Hoop om vir altyd

te lewe aan die volmaakte kant van ewigheid.

“Die Here verydel die raadsplanne van nasies, Hy dwarsboom die planne van volke. Die raadsplan van die Here bestaan vir ewig, die planne wat Hy bedink, van geslag tot geslag. Gelukkig is die nasie wie se God die Here is, die volk wat Hy as sy eiendom gekies het. Uit die hemel kyk die Here, Hy sien alle mense. Uit die plek waar Hy woon beskou Hy al die bewoners van die aarde, Hy wat elkeen van hulle se denke vorm, insig het in alles wat hulle doen. Geen koning word deur ‘n groot leër verlos nie; ‘n krygsheld red homself nie deur groot krag nie. ‘n Perd bied vals hoop vir oorwinning, deur sy groot krag kan hy nie bevry nie. Kyk, die Here hou sy oog op dié wat vir Hom ontsag het, op dié wat hulle hoop vestig op sy troue liefde, om hulle lewens van die dood te red en hulle aan die lewe te hou tydens hongersnood. Met ons hele wese wag ons op die Here; Hy is ons hulp en ons skild. Want oor Hom is ons harte verheug, ja, op sy •heilige Naam vertrou ons. Mag u troue liefde oor ons wees, Here, terwyl ons op U wag!”  —‭‭Psalms‬ ‭33‬:‭10‬-‭22‬ ‭AFR20‬‬