‘n Gediggie oor 2-9 opgedra aan my geliefde daughter-in-love, Chanré, op haar 29e verjaardag.

Ons wêreld is evalueringsbefoeterd

Alles-of-niks word onderskryf

Die standaarde is skeef en

Die maatstawwe is ongesond

 

Almal ken die 1-10 skaal en

Alles word hieraan gemeet

Net 1 of 10 tel regtig, want

Tussenin is ‘n verleentheid

 

Daar iewers tussen 1 en 10

Lê die digste riwwe van

Vindingrykheid gereed om

Ontdek en ontgin te word

 

Deur ongekende begaafdes

Wat gemaklik tussen 2 en 9

Beweeg en bedryf om dan

Balans te bring en te vestig

 

Nie op die verhoog of grootskerm

Waar almal dit kan sien nie, maar

Waar die tekkie die teer ontmoet

Daar waar almal dit nodig het

 

Hierdie 2-9 mense is soos gom

Wat die samelewing stewig heg

Noodsaaklik soos water en lug

Vir almal, selfs die 1’e en 10’e ook

 

Die 2-9 mense het ‘n geheim

Mislukkings maak hulle sterker

Topprestasies maak hulle stiller

Hulle is die onbesonge helde

Chanré, jy is beslis ‘n besondere onbesonge held (ek vermy steeds geslagstoekenning aan Afrikaanse selfstandige naamwoorde vanweë die Engelse flater mistress of ceremonies). Al is jy besonder begaafd en score jy gereeld, in baie areas ‘n volmaakte 10, is jy gemaklik daarmee om in die 2-9-tussenin te beweeg en noodsaaklike balans te bring. Jou prestasies is selfs meer prysenswaardig omdat jy nie jou menswaardigheid daaraan heg nie. Jy is level-headed en jou  onmiskenbare beskeidenheid skyn helderder as enige van die bekende sterre in die glanswêreld!

Baie geluk met jou verjaardag, my sweetheart! Mag ons Heer jou met nog baie meer seën! ❤️

Micah het hierdie vir jou op sy tablet gemaak:

“Vir die opregtes hou Hy vindingrykheid in bewaring, as ‘n skild vir hulle wat onberispelik leef,”
‭‭Spreuke‬ ‭2‬:‭7‬ ‭AFR20‬‬