Van opsteldreigement tot publikasie-aanbod

AGTERGROND:

Lank, lank gelede het ek ‘n juffrou gehad wat ons gereeld gedreig het met die straf om ‘n duisend-woorde opstel te skryf oor DIE KLEINKOEKIEBEDRYF VAN SUID-ALASKA.  Dit was etlike dekades voor die internet en KI.  Ek het nie regtig geweet waar Alaska is nie, maar ek het geweet dat almal koekies eet, selfs aan die onderkant van ‘n onbekende plek.  Die herinnering het aanleiding gegee tot hierdie gediggie.

Haar koekiebakreis het

‘n paar jaar gelede begin.

Effe skeef en krom, maar

sonder twyfel tuisgebak.

 

Daar was eksperimente

met verskeie bestanddele.

JellyTots, Smarties,

Rolo’s en PienkPilletjies.

 

Daar was belangstelling

in haar ongewone koekies,

maar vir die meeste mense

was ‘n koekie net ‘n koekie.

 

Daar was selfs waardering

vir haar koekies sonder gelyke,

maar die meeste mense wou nie

hulle lekkernye in ‘n koekie hê nie.

 

Die toetssnobs van tuisnywerhede

sou altyd heerlik smul aan haar

gratis voorbeeldpakkies, maar

wou nooit haar koekies bemark nie.

 

Toe ontmoet sy ‘n koekiebak-koningin

wie se koekies op die rakke van

tuisnywerhede landswyd verskyn en

Bobaas en Beginner word hegte vriende.

 

Bobaas het die grootste waardering

vir Beginner se koekies ontwikkel en

dit ook self bekendgestel en bemark.

Bobaas het Beginner getrou ondersteun.

 

Dit het begin blyk dat al Beginner se

pogings om haar koekies te bemark,

bedoel was om hopeloos te misluk.

Toe maak Bobaas daardie opmerking.

 

Beginner se koekies was lankal

nie meer skeef en krom nie, maar

sy het wesenlik haar suikerkoekies

aan diabete probeer bemark.

 

Dit was tyd vir herbeplanning,

herkalibrasie en ‘n wêreldkaart.

Daar is ‘n kleinkoekiebedryf wat

belangstel in Beginner se koekies.

 

En hulle is net-net suid-oos van Suid-Alaska geleë!