gewaarwordingsgediggie van ‘n visbevange VrygekoopteBaanbreker

In my ou lewensvissersbootjie

probeer ek om ‘n bestaan te maak.

Ek spook en ek spartel en

ek swoeg en ek sweet, want dit

moet waardig en volhoubaar wees.

 

Soms werk dit glad en netjies, maar

ander kere werk dit glad nie en dan

voel ek soos vuisvoos Petrus wat

heelnag nette uitgooi en dan, visloos,

met leë nette terugkeer in die oggend.

 

Soos met Petrus, neem Jesus

my ook noukeurig waar op die water.

Hy ken my binnekant en Hy ken

ook die binnekant van my bootjie.

Steeds roep en vra Hy hoe dit gaan.

 

Vir Hom is ek altyd waardig en Hy

beskik oor my lewensvolhoubaarheid.

Of ek nou visvolop of visloos opdaag,

Hy nooi my elke oggend vir ontbyt,

‘n genadegeskenk van Sy vis en brood.

 

Maar Here, ek dink nie U verstaan

my lewe en bediening so mooi nie.

Ek het nie tyd nie en ek het boonop

veel groter visse om vir U te braai.

Kyk net hoe vol is my nette!

 

Ek staan met ‘n yslike vis in my hande

om my punt aan Hom te illustreer.

Dan val my oë op die koolvuurtjie en

ek sien die geroosterde vis en vars brood.

Hy het dan glad nie my vis nodig nie…

 

Ek neem ‘n sitplek in by die koolvuurtjie en

terwyl ek, in verwondering, daarna staar,

word ek bewus van my skaamtelike gedrag.

Ek ontglip Hom wanneer ek visloos is en ek probeer

met Hom onderhandel wanneer Hy vis volop maak.

 

O Here Jesus, vergewe my asseblief?

Dat ek soms dink dat ek beter as U weet.

Dat ek U soms ontglip omdat ek skaam is.

Dat ek nie elke oggend die ontfermende liefde

van U vars, nuwe guns en genade omhels nie.

Here Jesus, anders as met Petrus destyds op

die strand, is U nie in menslike gestalte by ons nie.

Maar U is oral en steeds naby, net anders naby.

Dankie dat U teenwoordig is

in elke oomblik van my lewe.

Help my asseblief om U voorbeeld te volg,

om teenwoordig te wees in elke

oomblik wat ek gegun word en ook

om ander mense met die genade

van geroosterde kos te bedien

rondom ‘n warm koolvuurtjie en

hulle nie genadeloos uit te lewer

daaraan om self gerooster te word en

dan deur die wêreld verslind te word nie.

Amen.