‘n Afrikaanse Shakespearean sonnet

Met ‘n vuil, gevlekte voorskoot aan

bedien Hy die seer en stukkendes.

Sonder kroon en sonder waan.

Sonder bulderende bevele, nes Hy is.

 

Met verstaanbare eenvoudigheid

hef Hy die geringstes op en skuif Hy

die ingewikkelde aanstellerigheid

van die verwaandes heeltemal opsy.

 

Met Sy eie voete plat op die stowwerige

grond, buk Hy af om vuil voete te was.

Hy gluur nie na benede om die bewerige

vuilvoetiges te berispe nie, hulle is geen las.

 

Om Hom te volg, is om soos Hy te doen

en te lewe soos iemand met God versoen.

Luister gerus na die liedjie-weergawe van die gedig hier 👇🏼

Dankie aan my eersgeborene, Daniel van Aswegen, vir die liedjie.